ប្រជាជនអ៊ុយក្រែននៅក្នុងរដ្ឋធានី និងជាច្រើននាក់ផ្សេងទៀតត្រូវស្វែងរកទីជម្រកពេញមួយយប់ បន្ទាប់ពីប្រទេសរុស្ស៊ីបានបើកការវាយប្រហារតាមអាកាស ដោយបានសម្លាប់មនុស្ស និងរបួសជាង១០នាក់។
ថ្ងៃនេះ (ថ្ងៃទី 25 ឧសភា 2025) ទីភ្នាក់ងារសារព័ត៌មានបរទេសបានរាយការណ៍ថា ប្រជាជននៅទីក្រុងគៀវ ប្រទេសអ៊ុយក្រែនបានជ្រកកោននៅក្នុងស្ថានីយ៍រថភ្លើងក្រោមដីទាំងព្រឹកព្រលឹមម៉ោងក្នុងស្រុក បន្ទាប់ពីប្រទេសរុស្ស៊ីបានបើកការវាយប្រហារលើទីក្រុងគៀវ និងទីក្រុងជាច្រើនទៀតនៅក្នុងប្រទេស។
មន្ត្រីក្រុងគៀវ បាននិយាយថា មនុស្សយ៉ាងតិច ១១នាក់ បានរងរបួស នៅក្នុងការវាយប្រហារ ដោយយន្តហោះគ្មានមនុស្សបើក នៅក្នុងរដ្ឋធានី ហើយយ៉ាងហោចណាស់ មនុស្ស ៣នាក់ ត្រូវបានសម្លាប់ នៅក្នុងទីក្រុងជុំវិញ។ ក៏មានរបាយការណ៍អំពីការខូចខាតអគារលំនៅដ្ឋាន និងផ្ទះមួយចំនួនផងដែរ។
ការវាយប្រហារនេះបានកត់សម្គាល់នៅយប់ទីពីរជាប់គ្នានៃការវាយប្រហារធំៗ។ នៅល្ងាចថ្ងៃទី ២៣ ឧសភា រុស្ស៊ីបានបាញ់បង្ហោះយន្តហោះគ្មានមនុស្សបើក និងមីស៊ីលរយៈចម្ងាយឆ្ងាយរាប់សិបគ្រឿងចូលទៅក្នុងទីក្រុងគៀវ ក្នុងការវាយប្រហារតាមអាកាសដ៏ធំបំផុតមួយលើរដ្ឋធានីអ៊ុយក្រែន។ ចាប់តាំងពីសង្គ្រាមបានចាប់ផ្តើមជាងបីឆ្នាំមុន។
ក្រសួងការពារជាតិរុស្ស៊ីបាននិយាយថា ការការពារដែនអាកាសរបស់ខ្លួនបានស្ទាក់ចាប់ ឬបំផ្លាញយន្តហោះគ្មានមនុស្សបើករបស់អ៊ុយក្រែនចំនួន ៩៥ គ្រឿងក្នុងរយៈពេល ៤ ម៉ោង។
ការវាយប្រហារកើតឡើងនៅពេលដែលសហរដ្ឋអាមេរិក និងប្រទេសលោកខាងលិចជំរុញឱ្យមានបទឈប់បាញ់នៅអ៊ុយក្រែន ហើយកើតឡើងបន្ទាប់ពីអ៊ុយក្រែន និងរុស្ស៊ីបានបញ្ចប់ការដោះដូរអ្នកទោសដ៏ធំបំផុតចាប់តាំងពីការចាប់ផ្តើមនៃសង្គ្រាមពេញលេញនៅឆ្នាំ 2022 ។
ប្រែសម្រួលៈ ហូរ មុនីវ័ន្ត
