រដ្ឋាភិបាលសហរដ្ឋអាមេរិកបានបញ្ជាឱ្យស្ថានទូតនានាជុំវិញពិភពលោកផ្អាកការណាត់ជួបទិដ្ឋាការសិស្ស ដោយរៀបចំពង្រីកវិធានការត្រួតពិនិត្យការប្រើប្រាស់ប្រព័ន្ធផ្សព្វផ្សាយអនឡាញរបស់អ្នកដាក់ពាក្យសុំទិដ្ឋាការបែបនេះ មុនពេលធ្វើដំណើរទៅសិក្សានៅសហរដ្ឋអាមេរិក។
ថ្ងៃនេះ (ថ្ងៃទី 28 ឧសភា ឆ្នាំ 2025) រដ្ឋាភិបាលសហរដ្ឋអាមេរិកបានបញ្ជាឱ្យស្ថានទូត និងស្ថានកុងស៊ុលទូទាំងពិភពលោកផ្អាកជាបណ្តោះអាសន្ននូវកាលវិភាគសម្ភាសន៍សម្រាប់អ្នកដាក់ពាក្យសុំទិដ្ឋាការសិស្ស និងអ្នកចូលរួមកម្មវិធីផ្លាស់ប្តូរ ដែលមានប្រសិទ្ធភាពភ្លាមៗ រហូតដល់ការណែនាំបន្ថែមត្រូវបានប្រកាស។ ទោះជាយ៉ាងណាក៏ដោយអ្នកដែលបានធ្វើការណាត់ជួបរួចហើយអាចបន្តធ្វើការសម្ភាសន៍បាន។
បទបញ្ជាដែលចុះហត្ថលេខាដោយរដ្ឋមន្ត្រីការបរទេសអាមេរិក Marco Rubio បានបញ្ជាក់ផងដែរថា ក្រសួងការបរទេសកំពុងរៀបចំពង្រីកគោលការណ៍ណែនាំរបស់ខ្លួនសម្រាប់ការត្រួតពិនិត្យការប្រើប្រាស់ប្រព័ន្ធផ្សព្វផ្សាយសង្គមរបស់អ្នកដាក់ពាក្យសុំទិដ្ឋាការសិស្សទាំងអស់ បន្ទាប់ពីវិធានការត្រួតពិនិត្យមួយចំនួនត្រូវបានអនុវត្តពីមុន ដោយផ្តោតលើអ្វីដែលរដ្ឋាភិបាលហៅថា “ការគាំទ្រចំពោះអំពើភេរវកម្ម”។
បញ្ហានេះមិនត្រឹមតែជាកង្វល់សម្រាប់អ្នកដែលកំពុងស្វែងរកទិដ្ឋាការសិស្សប៉ុណ្ណោះទេ ប៉ុន្តែក៏អាចប៉ះពាល់ដល់សាកលវិទ្យាល័យនៅសហរដ្ឋអាមេរិកផងដែរ ដោយសារស្ថាប័នជាច្រើនពឹងផ្អែកលើការផ្តល់មូលនិធិនិស្សិតអន្តរជាតិ ដែលជារឿយៗចំណាយច្រើនជាងនិស្សិតក្នុងស្រុក។
និស្សិតសាកលវិទ្យាល័យ Harvard តវ៉ាប្រឆាំងនឹងគោលនយោបាយ Trump
បាតុកររាប់រយនាក់ និស្សិត និងសាស្រ្តាចារ្យមកពីសាកលវិទ្យាល័យ Harvard បានប្រមូលផ្តុំគ្នានៅបរិវេណសាលា Massachusetts ដើម្បីតវ៉ាគាំទ្រនិស្សិតអន្តរជាតិ និងប្រឆាំងនឹងគោលនយោបាយដែលប្រើប្រាស់ដោយរដ្ឋបាល Trump ដើម្បីវាយប្រហារសាកលវិទ្យាល័យកំពូលមួយនេះ។
ការតវ៉ាបានកើតឡើងនៅពេលដែលរដ្ឋបាលសេវាសហព័ន្ធបញ្ជាឱ្យភ្នាក់ងារសហព័ន្ធពិនិត្យឡើងវិញ និងអាចលុបចោលកិច្ចសន្យាដែលនៅសល់ទាំងអស់ជាមួយសាកលវិទ្យាល័យ Harvard ដែលមានតម្លៃប្រហែល 100 លានដុល្លារ បន្ទាប់ពីបានលុបចោលមូលនិធិស្រាវជ្រាវចំនួន 3 ពាន់លានដុល្លារមុននេះរួចមកហើយ។
ប្រែសម្រួលៈ ហូរ មុនីវ័ន្ត
