លោក ភូមិថាំ វៈឆៈយៈឆៃ (ภูมิธรรมเวชยชัย) នាយករដ្ឋមន្រ្តីស្ដីទីរបស់ផ្ទះលេខ២ បានប្រើពាក្យសម្ដីព្រហើនគ្មានសីលធម៌ប្រមាថសម្ដេចតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥ ជាអគ្គមគ្គុទេសក៍ដ៏ឆ្នើម និងជាប្រធានព្រឹទ្ធសភានៃព្រះរាជាណាចក្រកម្ពុជា ថាជាមនុស្ស “គ្មានតម្លៃ”។
ការប្រមាថរបស់នាយករដ្ឋមន្រ្តីស្ដីទីរបស់ថៃ រូបនេះមកលើសម្ដេចតេជោ មិនត្រឹមតែជាការប្រមាថយ៉ាងធ្ងន់ធ្ងរចំពោះសម្ដេច និងក្រុមគ្រួសារសម្ដេចប៉ុណ្ណោះទេ ប៉ុន្តែវាក៏ជាការប្រមាថមកលើកម្ពុជា ទាំងមូលផងដែរ ហើយវាជាទង្វើដ៏លាមកឥតអៀនខ្មាសដូចក្មេងបៀមដៃដែលមិនអាចទទួលយកបានឡើយ។
ជាការកត់សម្គាល់ ឯកឧត្ដម ឃ្លាំង ហួត អភិបាលរងរាជធានីភ្នំពេញ បានបង្ហោះលើគណនីហ្វេសប៊ុកផ្លូវការរបស់លោកនៅថ្ងៃពុធ ទី១៦ ខែកក្កដា មុននេះបន្តិច ឆ្លើយតបទៅនឹងការប្រមាធរបស់ផ្ទះលេខ២ ថា “ខ្ញុំសូមឆ្លើយតបចំពោះការលើកឡើងរបស់លោក ភូមិថាំ វៈឆៈយៈឆៃ (ภูมิธรรมเวชยชัย) នាយករដ្ឋមន្រ្តីស្ដីទីរបស់ថៃ ដែលបាននិយាយថា សម្ដេចតេជោ ហ៊ុន សែន គ្មានតម្លៃ។ តើលោកនាយករដ្ឋមន្រ្តីស្ដីទីនៅចាំបានទេ កាលពីថ្ងៃទី១៥ ខែមិថុនា ឆ្នាំ២០២៥ លោកបានអមនាយករដ្ឋមន្រ្តី ផៃថងថាន រង់ចាំជជែកតាមទូរស័ព្ទដើម្បីសុំចរចាជាមួយសម្ដេចតេជោ រហូតដល់៤ម៉ោង (ម៉ោង២រសៀល ដល់ម៉ោងប្រមាណជិត៦ល្ងាច) នេះសរបញ្ជាក់ឱ្យឃើញថា លោកច្បាស់ជាយល់ឃើញថា សម្ដេចតេជោ គឺជាតួអង្គដ៏សំខាន់ដែលមានអំណាច និងមានឥទ្ធិពលអាចសម្រេចអ្វីបាននៅកម្ពុជា”។
ឯកឧត្ដម ឃ្លាំង ហួត បានបន្ថែមទៀតថា “ខ្ញុំសូមឆ្លើយទៅលោកវិញថា សម្ដេចតេជោ ជានិមិត្តរូប នៃសុខសន្តិភាព សម្ដេចបានលះបង់សាច់ស្រស់ឈាមស្រស់ដើម្បីរំដោះ និងកសាងប្រទេសជាតិឱ្យមានការរីកចម្រើន និងជាវីរបុរសដែលប្រជាជនកម្ពុជា គោរពស្រលាញ់ជាទីបំផុត”៕
ដោយ៖ RT News
