ការវាយប្រហារតាមអាកាសរបស់អ៊ីស្រាអែលបំផ្លាញរថក្រោះរបស់កងទ័ពស៊ីរីនៅភាគខាងត្បូងប្រទេសស៊ីរី បន្ទាប់ពីកងកម្លាំងរដ្ឋាភិបាលបានប៉ះទង្គិចគ្នាជាមួយកងកម្លាំង Druze បណ្តាលឲ្យមនុស្សស្លាប់ជាច្រើននាក់។
ទីភ្នាក់ងារព័ត៌មានអន្តរជាតិបានរាយការណ៍ថា កងទ័ពអ៊ីស្រាអែលបានបង្ហើបនៅថ្ងៃចន្ទ ទី 14 ខែកក្កដា ឆ្នាំ 2025 ថា ខ្លួនបានវាយប្រហាររថក្រោះរដ្ឋាភិបាលនៅក្នុងទីក្រុង Sweda ភាគខាងត្បូងប្រទេសស៊ីរី ជាកន្លែងដែលកងកម្លាំងរដ្ឋាភិបាលស៊ីរី និងកងកម្លាំង Bedouin បានប៉ះទង្គិចជាមួយក្រុមប្រដាប់អាវុធ Druze កាលពីចុងសប្តាហ៍កន្លងមក។
ការប៉ះទង្គិចគ្នាបានចាប់ផ្តើមជាមួយនឹងការប្រយុទ្ធគ្នារវាងក្រុមប្រដាប់អាវុធ Druze និងកងកម្លាំង Bedouin កាលពីថ្ងៃអាទិត្យ ត្រឹមតែពីរថ្ងៃបន្ទាប់ពីពាណិជ្ជករ Druze ត្រូវបានចាប់ពង្រត់ពីផ្លូវនានាក្នុងទីក្រុង Damascus ។ នៅថ្ងៃច័ន្ទ ទី 14 ខែកក្កដា រដ្ឋាភិបាលស៊ីរីបានបញ្ជូនទាហានចូលទៅគ្រប់គ្រងស្ថានការណ៍ ដែលនាំឱ្យមានការប៉ះទង្គិចគ្នាកាន់តែច្រើនជាមួយកងកម្លាំង Druze ។
ក្រសួងមហាផ្ទៃស៊ីរីបាននិយាយថាមនុស្សយ៉ាងហោចណាស់៣០នាក់បានស្លាប់និងជិត១០០នាក់រងរបួសក្នុងការប៉ះទង្គិចគ្នានេះ។ ប៉ុន្តែក្រុមឃ្លាំមើលសិទ្ធិមនុស្សស៊ីរី (SOHR) អះអាងថា យ៉ាងហោចណាស់មនុស្ស ៨៩ នាក់ត្រូវបានសម្លាប់នៅក្នុងការប៉ះទង្គិចគ្នានោះ រួមមានកុមារពីរនាក់ ស្ត្រីពីរនាក់ និងសមាជិកនៃកងកម្លាំងសន្តិសុខ ១៤ នាក់ ។
ការវាយប្រហារចុងក្រោយបង្អស់របស់អ៊ីស្រាអែលត្រូវបានគេជឿថាជាការគាំទ្រដល់ក្រុម Druze ដែលក្នុងនោះប្រហែល 1 លាននាក់កំពុងរស់នៅទូទាំងពិភពលោក ច្រើនជាងពាក់កណ្តាលនៅក្នុងប្រទេសស៊ីរី និងនៅសល់នៅលីបង់ និងអ៊ីស្រាអែល។
នៅអ៊ីស្រាអែល Druze ត្រូវបានគេមើលឃើញថាជាជនជាតិភាគតិចដ៏ស្មោះត្រង់ ហើយជារឿយៗបម្រើក្នុងជួរយោធាអ៊ីស្រាអែល។ អ៊ីស្រាអែលបានធ្វើអន្តរាគមន៍ក្នុងប្រទេសស៊ីរីនាពេលកន្លងមកដើម្បីការពារ Druze ទោះបីជាមនុស្សជាច្រើននៅក្នុងប្រទេសស៊ីរីមិនចង់ឱ្យអ៊ីស្រាអែលធ្វើអន្តរាគមន៍ជំនួសពួកគេក៏ដោយ។
ក្រសួងការបរទេសស៊ីរីបានអំពាវនាវឱ្យប្រទេស និងអង្គការទាំងអស់គោរពសិទ្ធិអំណាចនៃសាធារណរដ្ឋអារ៉ាប់ស៊ីរី និងបដិសេធមិនគាំទ្រចលនាបំបែកខ្លួនណាមួយឡើយ ហើយបានអំពាវនាវឱ្យប្រជាជនស៊ីរីបញ្ឈប់អំពើហិង្សា បោះបង់ចោលអាវុធខុសច្បាប់ និងរារាំងអ្នកដែលព្យាយាមញុះញង់ឱ្យមានការបែកបាក់។
អត្ថបទដោយ៖ ហូរ មុនីវ័ន្ត
ប្រភព៖ apnews
