មេដឹកនាំអាមេរិកបានផ្លាស់ប្តូរជំហរជាថ្មីម្តងនេះ ស្តីពីសង្គ្រាមនៅអ៊ុយក្រែន បន្ទាប់ពីថ្មីៗនេះបានប្រកាសភ្លើងខៀវអនុញ្ញាតឱ្យបណ្តាប្រទេសអឺរ៉ុបបញ្ជូនប្រព័ន្ធមីស៊ីល Patriot ទៅកាន់អ៊ុយក្រែន ដើម្បីទប់ទល់នឹងរុស្ស៊ី។
ប្រធានាធិបតីអាមេរិកលោក Donald Trump បានប្រកាសថា លោកនឹងដំឡើងពន្ធនាំចូលលើទំនិញពីដៃគូពាណិជ្ជកម្មរបស់រុស្ស៊ី 100 ភាគរយ ប្រសិនបើរុស្ស៊ីមិនអាចឈានដល់កិច្ចព្រមព្រៀងសន្តិភាពដើម្បីបញ្ចប់សង្រ្គាមនៅអ៊ុយក្រែនដែលបានអូសបន្លាយជាង 3 ឆ្នាំក្នុងរយៈពេល 50 ថ្ងៃ។
វិធានការនេះមានគោលបំណងដាក់សម្ពាធសេដ្ឋកិច្ចបន្ថែមទៀតលើរុស្ស៊ី ព្រោះប្រសិនបើវាចូលជាធរមាន វានឹងមានន័យថាប្រទេសណាដែលបន្តធ្វើពាណិជ្ជកម្មជាមួយរុស្ស៊ីនឹងត្រូវប្រឈមមុខនឹងពន្ធ 100 ភាគរយ ប្រសិនបើខ្លួនចង់លក់ទំនិញទៅសហរដ្ឋអាមេរិក។ ជាឧទាហរណ៍ ប្រទេសដែលទិញប្រេងពីរុស្ស៊ី ដូចជាឥណ្ឌា ឬចិន នឹងត្រូវបង់ពន្ធនាំចូល 100 ភាគរយ នៅពេលដែលពួកគេលក់ទំនិញទៅឱ្យក្រុមហ៊ុននៅសហរដ្ឋអាមេរិក ដែលនឹងធ្វើឱ្យទំនិញមានតម្លៃថ្លៃជាងមុន ដូច្នេះអ្នកទិញនៅសហរដ្ឋអាមេរិកទំនងជានឹងងាកទៅទិញទំនិញពីប្រភពថោកជាង ដែលនាំឱ្យប្រទេសទាំងនោះបាត់បង់ប្រាក់ចំណូល។
នៅពេលដែលប្រទេសនានាឈប់ឧបត្ថម្ភធនលើទំនិញពីរុស្ស៊ី ហើយរុស្ស៊ីមិនទទួលបានប្រាក់ចំណូលពីការលក់ប្រេងទៅប្រទេសផ្សេងទៀត នោះនឹងមានប្រាក់តិចជាងដើម្បីធ្វើសង្គ្រាមនៅអ៊ុយក្រែន។ ប្រេងនិងឧស្ម័នបង្កើតបានជិតមួយភាគបីនៃប្រាក់ចំណូលរដ្ឋរបស់រុស្ស៊ី ហើយមានចំនួនច្រើនជាង 60 ភាគរយនៃការនាំចេញ។
អាមេរិកអនុម័តការបញ្ជូនអាវុធទៅអ៊ុយក្រែនតាមរយៈអង្គការណាតូ
ចំណាត់ការដែលត្រូវបានឃ្លាំមើលយ៉ាងដិតដល់ដែលបានធ្វើឡើងតាមសំណើរបស់អ៊ុយក្រែនបានកើតឡើងបន្ទាប់ពីលោក Trump បានជួបជាមួយអគ្គលេខាធិការអង្គការណាតូលោក Mark Rutter នៅសេតវិមាន ដោយបើកផ្លូវសម្រាប់សមាជិកណាតូក្នុងការបញ្ជូនប្រព័ន្ធមីស៊ីល Patriot កម្រិតខ្ពស់ទៅកាន់អ៊ុយក្រែន។
បណ្តាប្រទេសអ៊ឺរ៉ុបនឹងបញ្ជូនប្រព័ន្ធនៅក្នុងឃ្លាំងអាវុធរបស់ពួកគេទៅអ៊ុយក្រែនជាលើកដំបូង បន្ទាប់មកលោក Trump នឹងបើកភ្លើងខៀវលើការលក់ប្រព័ន្ធ Patriot ទៅកាន់ប្រទេសផ្សេងទៀតដែលបានផ្គត់ផ្គង់អាវុធដល់អ៊ុយក្រែន រួមជាមួយនឹងមីស៊ីល និងគ្រាប់រំសេវផ្សេងទៀត។ មេដឹកនាំទាំងពីរមិនបានបញ្ជាក់លម្អិតទេ។
លោក Rutter បាននិយាយថា អាល្លឺម៉ង់ កាណាដា ដាណឺម៉ាក ហ្វាំងឡង់ ហូឡង់ ន័រវែស ស៊ុយអែត និងចក្រភពអង់គ្លេស ស្ថិតក្នុងចំណោមប្រទេសដែលបញ្ជូនអាវុធទៅអ៊ុយក្រែន ដោយបន្ថែមថា ប្រសិនបើគាត់ជាលោក វ្ល៉ាឌីមៀ ពូទីន ហើយបានឮរឿងនេះ គាត់នឹងពិចារណាឡើងវិញយ៉ាងម៉ត់ចត់នូវកិច្ចចរចាសន្តិភាពជាមួយអ៊ុយក្រែន។
លោក Trump ធ្លាប់បាននិយាយថាគាត់ “មិនសប្បាយចិត្ត” ជាមួយប្រធានាធិបតី Putin ដោយទទូចថា ការអត់ធ្មត់របស់គាត់បានអស់ហើយ។ បន្ទាប់ពីការព្យាយាមជាច្រើនខែដើម្បីបញ្ចុះបញ្ចូលមេដឹកនាំរុស្ស៊ីចាប់តាំងពីចូលកាន់តំណែង បន្ទាប់ពីបានសន្យាក្នុងអំឡុងពេលយុទ្ធនាការបោះឆ្នោតរបស់គាត់ថា នឹងបញ្ចប់សង្រ្គាមនៅអ៊ុយក្រែនក្នុងរយៈពេល 24 ម៉ោង។
ការសម្រេចចិត្តរបស់លោក Trump ក្នុងការបញ្ជូនអាវុធទៅកាន់អ៊ុយក្រែន គឺជាការផ្លាស់ប្តូរដ៏សំខាន់មួយពីជំហរផ្សះផ្សាពីមុនរបស់លោកជាមួយលោក Putin ជាពិសេសបន្ទាប់ពីការប៉ះទង្គិចរបស់គាត់ជាមួយមេដឹកនាំអ៊ុយក្រែនកាលពីថ្ងៃទី 28 ខែកុម្ភៈនៅឯសេតវិមាន។
ប្រធានាធិបតីអ៊ុយក្រែនលោក Volodymyr Zelensky បាននិយាយថា លោកបាននិយាយជាមួយលោក Trump ហើយមានអំណរគុណចំពោះកិច្ចព្រមព្រៀងសព្វាវុធ ហើយបានត្រៀមខ្លួនរួចជាស្រេចក្នុងការបន្តការពារអាយុជីវិតរបស់អ៊ុយក្រែន។
ប្រព័ន្ធមីស៊ីល Patriot មានសារសំខាន់សម្រាប់អ៊ុយក្រែន ក្នុងមធ្យោបាយជាច្រើន ជាពិសេសក្នុងការការពារប្រឆាំងនឹងការវាយប្រហារតាមអាកាសរបស់រុស្ស៊ី។ Patriot គឺជាប្រព័ន្ធមួយក្នុងចំណោមប្រព័ន្ធមួយចំនួនដែលមានសមត្ថភាពស្ទាក់ចាប់មីស៊ីលផ្លោងរយៈចម្ងាយឆ្ងាយ កាំជ្រួច Cruise និងកាំជ្រួចយុទ្ធសាស្ត្រ ដែលរុស្ស៊ីតែងតែប្រើដើម្បីវាយប្រហារអ៊ុយក្រែន ហើយមានភាពត្រឹមត្រូវ និងប្រសិទ្ធភាពខ្ពស់។
ដោយ៖ ហូរ មុនីវ័ន្ត
