រុស្សីបានបញ្ជូនយន្តហោះគ្មានមនុស្សបើកចំនួន៤០០គ្រឿង កាំជ្រួច១៨គ្រឿងទៅវាយប្រហារអ៊ុយក្រែនម្តងទៀត បង្កការខូចខាតជាច្រើនកន្លែងនៅទូទាំងរដ្ឋធានី សម្លាប់មនុស្ស ២នាក់ និងរបួស១៦នាក់ ក្នុងពេលជាមួយគ្នានេះ មានសេចក្តីរាយការណ៍ថា “លោក Trump” នឹងប្រើប្រាស់អំណាចប្រធានាធិបតី ដើម្បីបញ្ជូនអាវុធទៅកាន់អ៊ុយក្រែនជាលើកដំបូង។
សាក្សីដែលបានឃើញផ្ទាល់ភ្នែកបានកត់ត្រាពេលដែលយន្តហោះគ្មានមនុស្សបើករបស់រុស្ស៊ីបានវាយប្រហាររដ្ឋធានី Kyiv របស់អ៊ុយក្រែន បណ្តាលឱ្យមានការផ្ទុះដ៏ខ្លាំងក្លាមួយ។ បន្ទាប់ពីយប់ថ្ងៃទី ៩ ខែកក្កដា ដល់ថ្ងៃទី ១០ ខែកក្កដា ឆ្នាំ ២០២៥ រុស្ស៊ីបានបញ្ជូនយន្តហោះគ្មានមនុស្សបើកប្រមាណ ៤០០ គ្រឿង និងបានបាញ់កាំជ្រួចចំនួន ១៨ គ្រាប់ទៀត ដើម្បីវាយប្រហារអ៊ុយក្រែន បង្កឲ្យមានការផ្ទុះយ៉ាងខ្លាំងទូទាំងទីក្រុង និងបាញ់ប្រហារជាច្រើនកន្លែង។
វីដេអូឃ្លីបមួយទៀតបានថតសំឡេងផ្ទុះ និងម៉ាស៊ីនកាន់តែខ្លាំងឡើងៗ អមដោយសំឡេងផ្ទុះ និងសំឡេងស្រែកឆោឡោ។ ខណៈដែលមនុស្សរាប់ពាន់នាក់នៅទីក្រុង Kyiv ត្រូវជ្រកកោនក្នុងរថភ្លើងក្រោមដីពេញមួយយប់ អ្នកខ្លះបានរត់គេចខ្លួនអស់មួយជីវិត បន្ទាប់ពីអគារលំនៅដ្ឋានត្រូវបានខូចខាតយ៉ាងធ្ងន់ធ្ងរដោយការវាយប្រហារ។
រលកចុងក្រោយនៃការវាយប្រហាររបស់រុស្ស៊ី បានបណ្តាលឲ្យមនុស្សយ៉ាងហោចណាស់ 2 នាក់ស្លាប់ របួស 16 នាក់ និងឆេះអគារជាច្រើនកន្លែង។ អគារលំនៅដ្ឋានត្រូវបានខូចខាត ដោយមានការខូចខាតបានរាយការណ៍នៅក្នុងសង្កាត់ចំនួនប្រាំបីក្នុងចំណោមស្រុកចំនួន 10 របស់ទីក្រុង Kyiv។
រុស្ស៊ីផ្លាស់ប្តូរយុទ្ធសាស្ត្រសម្រាប់អ៊ុយក្រែន
រុស្ស៊ីបានបង្កើនការវាយប្រហារតាមអាកាសរបស់ខ្លួនលើអ៊ុយក្រែនក្នុងរយៈពេលប៉ុន្មានសប្តាហ៍ថ្មីៗនេះ ប៉ុន្តែការវាយប្រហារកាលពីយប់ថ្ងៃទី ១០ ខែកក្កដា មិនត្រឹមតែជាយប់ទីពីរជាប់ៗគ្នានៃការទម្លាក់គ្រាប់បែកយ៉ាងធ្ងន់ប្រឆាំងនឹងអ៊ុយក្រែននោះទេ បន្ទាប់ពីបានបញ្ជូនយន្តហោះគ្មានមនុស្សបើក ៧២៨ គ្រឿង និងកាំជ្រួច ១៣ គ្រឿងកំទេចអ៊ុយក្រែនកាលពីយប់ថ្ងៃទី ៨ ខែកក្កដា ប៉ុន្តែក៏មានការផ្លាស់ប្តូរយុទ្ធសាស្ត្រផងដែរ។
នៅក្នុងការវាយប្រហាររលកចុងក្រោយនេះ កាំជ្រួច និងយន្តហោះគ្មានមនុស្សបើករបស់រុស្ស៊ីបានហោះក្នុងរយៈកម្ពស់ខុសៗគ្នា និងវាយប្រហារពីគ្រប់ទិសទី។ យន្តហោះគ្មានមនុស្សបើកមួយចំនួនបានហោះពីលើរដ្ឋធានី ហើយបានផ្លាស់ប្តូរទិសដៅភ្លាមៗ ហើយហោះហើរយ៉ាងលឿនត្រឡប់ទៅទីក្រុងគៀវវិញ។
ថ្វីបើអ៊ុយក្រែនត្រូវបានវាយប្រហារពីទិសដៅជាច្រើនកាលពីអតីតកាល នៅពេលដែលយន្តហោះគ្មានមនុស្សបើករបស់រុស្ស៊ីព្យាយាមគេចពីប្រព័ន្ធការពារដែនអាកាស ការវាយប្រហារនៅថ្ងៃនេះមានជាប់ពាក់ព័ន្ធនឹងយន្តហោះគ្មានមនុស្សបើកជាច្រើនដែលវាយប្រហារទីក្រុងក្នុងពេលតែមួយ ដោយឡោមព័ទ្ធជាមុនពេលវាយប្រហារ។
យុទ្ធសាស្ត្រនេះធ្វើឱ្យវាកាន់តែពិបាកសម្រាប់ការការពារដែនអាកាសរបស់អ៊ុយក្រែនក្នុងការបំពេញការងាររបស់ពួកគេ ប៉ុន្តែយោធាអ៊ុយក្រែននិយាយថា ខ្លួនបានបំផ្លាញ ឬស្ទាក់ចាប់អាវុធអាកាសចំនួន ៣៨២ ក្នុងចំណោមអាវុធអាកាសសរុបចំនួន ៤១៥ រួមទាំងកាំជ្រួចរយៈចម្ងាយឆ្ងាយ និងកាំជ្រួចធ្វើដំណើរ។ វាជាជោគជ័យមួយដែលគិតពីទំហំនៃការវាយប្រហារលើការការពារដែនអាកាសមានកម្រិតរបស់អ៊ុយក្រែន។
ក្រសួងការពារជាតិរុស្ស៊ីបាននិយាយថា ប្រទេសរុស្ស៊ីបានកំណត់គោលដៅលើបរិវេណឧស្សាហកម្មយោធានៅទីក្រុង Kyiv និងហេដ្ឋារចនាសម្ព័ន្ធអាកាសយានដ្ឋានយោធាអ៊ុយក្រែន ទោះបីជាអ៊ុយក្រែនរាយការណ៍អំពីការខូចខាតផ្ទះ អគារការិយាល័យ រោងចក្រ យានយន្ត និងទ្រព្យសម្បត្តិផ្សេងទៀតនៅទូទាំងទីក្រុងក៏ដោយ។
លោក Trump គ្រោងនឹងប្រើប្រាស់អំណាចប្រធានាធិបតី ដើម្បីបញ្ជូនអាវុធទៅកាន់អ៊ុយក្រែន
សារព័ត៌មាន Reuters ដោយដកស្រង់ប្រភពពីរបានរាយការណ៍ថា ប្រធានាធិបតីអាមេរិកលោក Donald Trump នឹងបញ្ជូនអាវុធទៅកាន់អ៊ុយក្រែនជាលើកដំបូងចាប់តាំងពីការវិលត្រឡប់មកកាន់តំណែងជាលើកទីពីរ។ លោក Trump នឹងប្រើប្រាស់សិទ្ធិអំណាចដកអាវុធរបស់ប្រធានាធិបតី ដើម្បីបញ្ជូនអាវុធទៅកាន់អ៊ុយក្រែន ដែលអាចមានតម្លៃប្រហែល 300 លានដុល្លារ។
លោក Trump ធ្លាប់បាននិយាយថា លោកនឹងពិចារណាបញ្ជូនប្រព័ន្ធការពារដែនអាកាស Patriot ទៅកាន់ប្រទេសអ៊ុយក្រែន ដែលលោក Trump បាននិយាយថា សហរដ្ឋអាមេរិកត្រូវការប្រើដើម្បីការពារខ្លួន។ មកទល់ពេលនេះ សព្វាវុធដែលរដ្ឋបាល Trump បានបញ្ជូនទៅកាន់ប្រទេសអ៊ុយក្រែន គឺត្រូវបានអនុម័តដោយអតីតប្រធានាធិបតី Joe Biden ប៉ុណ្ណោះ។
សារព័ត៌មាន AP បានរាយការណ៍ថា កាលពីថ្ងៃទី៩ ខែកក្កដា អាមេរិកបានបញ្ជូនសព្វាវុធជាច្រើនទៅកាន់អ៊ុយក្រែន។ នេះរួមបញ្ចូលទាំងគ្រាប់រំសេវ 155 មីលីម៉ែត្រ និងប្រព័ន្ធរ៉ុក្កែតដឹកនាំច្រើនប្រភេទ (GMLRS) ដែលពេលវេលានៅមិនទាន់ច្បាស់នៅឡើយ។
ប្រធានាធិបតីអ៊ុយក្រែនលោក Volodymyr Zelensky ដែលកំពុងចូលរួមសន្និសីទស្តីពីការស្តារឡើងវិញអ៊ុយក្រែន (URC2025) នៅទីក្រុងរ៉ូម ប្រទេសអ៊ីតាលី បាននិយាយថា អ៊ុយក្រែនបានទទួលសញ្ញានយោបាយពីសហរដ្ឋអាមេរិកថា ខ្លួននឹងបន្តជំនួយយោធាឡើងវិញ បន្ទាប់ពីមានការពិភាក្សាក្នុងន័យស្ថាបនាជាមួយលោក Trump ។
លោក Zelensky ក៏បាននិយាយផងដែរថា អ៊ុយក្រែនមានកាលវិភាគ និងព័ត៌មានលម្អិតសម្រាប់ការទិញសព្វាវុធពីសហរដ្ឋអាមេរិកនាពេលខាងមុខ ហើយអ៊ុយក្រែនកំពុងពិភាក្សាជាមួយសហរដ្ឋអាមេរិកអំពីការទិញប្រព័ន្ធការពារដែនអាកាស Patriot ។ លោកក៏បាននិយាយថា អាល្លឺម៉ង់បានយល់ព្រមទិញប្រព័ន្ធ Patriot ចំនួនពីរសម្រាប់អ៊ុយក្រែន និងន័រវែសក៏នឹងទិញមួយអោយអ៊ុយក្រែនផងដែរ។
ទន្ទឹមនឹងនេះ នាយករដ្ឋមន្ត្រីអ៊ីតាលីលោក Giorgia Meloni បាននិយាយថា អ្នកចូលរួមនៅក្នុងសន្និសីទបានសន្យាផ្តល់ជំនួយដល់អ៊ុយក្រែនជាង 10 ពាន់លានអឺរ៉ូ ។
ជាមួយគ្នានេះ អធិការបតីអាល្លឺម៉ង់លោក Friedrich Merz បានបញ្ជាក់ថា អាល្លឺម៉ង់កំពុងរៀបចំទិញ Patriots ពីសហរដ្ឋអាមេរិកសម្រាប់អ៊ុយក្រែនផងដែរ ហើយក៏បានអំពាវនាវឱ្យរុស្ស៊ីបង់ប្រាក់ចំនួន 500 ពាន់លានអឺរ៉ូ ជាសំណងសម្រាប់ការខូចខាតនៅក្នុងប្រទេសអ៊ុយក្រែន។
ប្រែសម្រួល៖ ហូរ មុនីវ័ន្ត
ប្រភព៖ Reuters, AP
