ប្រទេសថៃ កំពុងលួងចិត្តប្រធានាធិបតី ដូណាល់ ត្រាំ ដោយបានស្នើសុំបញ្ចុះពន្ធគយលើទំនិញអាម៉េរិក មួយចំនួនធំមកត្រឹមសូន្យ% (០%) ដើម្បីបញ្ចៀសពន្ធគយខ្ពស់៣៦% ដែលសហអាម៉េរិក បានគំរាមដាក់លើទំនិញថៃ។ បន្ថែមពីលើនេះ ថៃ ក៏ព្រមបើកចំហទីផ្សារទទួលទិញទំនិញកសិកម្ម និងទំនិញឧស្សាហកម្ម ព្រមទាំងជួយទិញយន្តហោះ Boeing បន្ថែមទៀតពីសហរដ្ឋអាម៉េរិក ផងដែរ។ នេះបើយោងតាមការចុះផ្សាយរបស់កាសែតបាងកក ប៉ុស្ដិ៍ នៅថ្ងៃច័ន្ទ ទី៧ ខែកក្កដា។
រដ្ឋមន្ត្រីហិរញ្ញវត្ថុថៃ ឆៃ ជុនហាវ៉ាជីរ៉ា (Pichai Chunhavajira) បានប្ដេជ្ញាចំពោះសហរដ្ឋអាម៉េរិក ថា ប្រទេសថៃ នឹងព្យាយាមកាត់បន្ថយអតិរេកពាណិជ្ជកម្មទំហំ៤៦ពាន់លានដុល្លារ របស់ខ្លួនជាមួយសហរដ្ឋអាម៉េរិក ឱ្យបាន៧០%ក្នុងរយៈពេល៥ និងសន្យាធ្វើឱ្យមានតុល្យភាពពាណិជ្ជកម្មក្នុងរយៈពេលន្លោះពី៧ ទៅ៨ឆ្នាំ។
សំណើបញ្ចុះពន្ធ និងការផ្ដល់សម្បទានបន្ថែមដល់សហរដ្ឋអាម៉េរិក នេះនឹងត្រូវដាក់ឱ្យបានមុនថ្ងៃពុធ ទី៩ កក្កដា ដែលជាកាលបរិច្ឆេទផុតសុពលភាពនៃការផ្អាកអនុវត្តពន្ធថ្មីរបស់លោក ដូណាល់ ត្រាំ។ ប្រសិនបើសំណើទទួលយក ថៃ នឹងអាចកាត់បន្ថយពន្ធលើទំនិញអាម៉េរិក ភ្លាមៗ។
សូមបញ្ជាក់ផងដែរថា កាលពីពេលថ្មីៗនេះ ប្រទេសវៀតណាម ទើបតែទទួលបានការបញ្ចុះពន្ធពី៤៦%មកត្រឹម២០%ក្រោមកិច្ចព្រមព្រៀងថ្មីជាមួយសហរដ្ឋអាម៉េរិក ខណៈដែលថៃ សង្ឃឹមទទួលបានអត្រាពន្ធល្អជាងនេះក្នុងរង្វង់១០% ឬ ខ្ពស់បំផុត២០%៕
